雷山居士 - 2010-11-23 16:50:00
裁判隨共觱仔含咧喙咧爾，施琦毓就聽著校門外隔兩條車路一个隘門亓海仔口，海湧溢來溢去無得定亓聲說。邊頭亓許燕瑜，手䘼強欲乞伊搝斷。球埕咧凌方一个傳中，球飛向林金煥，施琦毓心跳強欲破錶。
裁判喙褫開，施琦毓金金看著有幾落袋仔亓空氣乞伊吸入去。伊亓喙脣佫沾著觱仔亓時陣，彼兩蕊目睭褫甲大母蕊(tuā-bú/ḿ-luí)，喙邊激甲無像雞胿，「嗶嗶嗶！」，雞胿開始落風（làu-huang）。球埕咧林金煥大聲喝，「入！」球隨黏咧跤咧都猶袂赴停，伊就按呢（tsia̋n）出死力共伊（kai）踢出去。
「來來來，較自覺咧，可樂倒捒。」「無！毋通！真真毋通，我一沐著酒目睭就會過敏！騙汝亓貓！」「恁父聽汝咧畫，我佫咧膦脬疼咧，目睭過敏！nǎu-nǎu-nǎu，無啉一杯，一杯就會挃得！」．．．
「三！無來兩！兩个無著！啊五个著汝啊！」「使汝亓破母啊，恁父今仔無燒香亓款吶！即杯投資喔？」「啊．．．投資投資，佫來。」．．．
「心愛亓！」「心愛亓！」「再會啦！」「再會啦！」「即段情，囥咧心肝頂」．．．
施琦毓共家己斟一杯果粒橙，啉到一半毋知誰接話筒過來，則隨按算欲擛（ia̍t）手呢，想想咧猶是接過來。亦毋管是啥物歌，就開始挐潲唱，橫直亦無儂咧聽。
是說，唱咧唱咧，毋知幹仔（kànn）直直感覺，吧台咧若有儂咧看伊爾。敢袂又佫是．．．施琦毓越頭小瞭一下，凌方坐佇吧台裡（nngh），毋知敿誰咧說話，看見（khuàinn）伊咧看伊，順手共酒矸攑起來，對家己搖兩下。施琦毓趕緊亦共家己彼杯果粒橙攑起來，佮伊乾杯。
掠我直直看亓儂應該是伊？施琦毓毋敢確定。欲繼續唱歌，話筒毋知底時就予儂搶去。邊頭亓許燕瑜而規暗靜靜，袂哭袂父，毋知伊咧想啥。雄雄聽著有儂喝家己去搖骰仔，害施琦毓甲煞(sah)仔，趕緊走過去。「我來囉我來囉，骰神來囉。」誰知連輸去四táu，骰神變膦神。
三點亓時節，規別墅亓儂已經倒去一半猶毋但。賰無幾个猶咧唱歌搖骰仔，講天掠皇帝。
「《康熙來了》哪有啥通看啊！」「“小S”敿“蔡康永”野好笑佫！無汝計看啥？」「儂阮是計看電影較濟喔，比如說“苍井老师”亓電影。」“苍井优？”“苍井空啦。”「“苍井空”哪有啥啊，我倒較愛“立花里子”。」「我囝咧，看勢汝亦野有研究吶！」「泛泛啦。」．．．
「我若像捌按佗落看著汝爾。」「kn̂g眠亓時節無佫，哈哈。」「Nǎu，儂我說正實亓吶！汝毋著毋通按呢！」「我欲來去洗手間咧一下。」「我共汝開門！」．．．
四點半，賰兩个喉欲無聲亓儂猶咧唱。施琦毓擋袂牢，目睭瞌落去。海湧溢來溢去無得定亓聲說，突然間出現佇伊亓耳空邊。邊頭亓許燕瑜，手䘼強欲乞伊搝斷。球埕咧凌方一个傳中，球飛向林金煥，施琦毓感覺家己亓心跳強欲破錶。
裁判喙褫開，施琦毓金金看著有幾落袋仔亓空氣乞伊吸入去。伊亓喙脣佫沾著觱仔亓時陣，彼兩蕊目睭褫甲大母蕊，喙邊激甲無像雞胿，「嗶嗶嗶！」，雞胿開始落風。球埕咧林金煥大聲喝，「入！」球隨黏咧跤咧都猶袂赴停，伊就按呢出死力共伊踢出去。
球īng守門員褲跤咧翱（kô）入去亓時節，施琦毓啊一下無時停，共許燕瑜亓手䘼搝咧，ka̍h咧搖。ka̍h咧搖ka̍h咧搖，烏白枋毋知啥物物件去搖落來，施琦毓越頭一看，許燕瑜亓校服領面頂甲空空。
硞。硞。硞。啥物聲。操場咧哪會有硞硞硞亓聲。物件交落去草咧，哪會是硞硞硞亓聲。施琦毓一下驚醒，看見許燕瑜坐佇塗跤咧，面向家己，頭ka̍h咧直直挵桌角。一下一下，一聲一聲，硞。硞，硞。
施琦毓煞煞(sah-sah)跪落去，頭共伊捍咧。燕瑜燕瑜ka̍h咧叫，伊都無半滴反應，兩蕊目睭反白仁，萬代恐怖。施琦毓手放開欲共伊插起去沙發裡(nngh)，伊又佫開始硞頭。施琦毓只好繼續共伊亓頭捍咧，驚甲目箍計紅去。
吧台咧有儂振動一下，挨(ue)落一个矸仔。害施琦毓又佫驚著一掣。「歹勢歹勢，動作傷大，煞害汝驚著。」凌方跍咧伊邊頭，那哈唏那說。「我來nǎu。」凌方共許燕瑜抱起來，向拄好賰落來亓一間無儂佔亓客房行過去。「共我亓冊包摕過來。」凌方吩咐施琦毓，「佇吧台下底，是，彼奇（kha）無賺（tānn）。」凌方接過冊包，跤共門一踢，施琦毓趕緊伸跤去擋。「放心啦，汝ná外口等，好勢我叫汝。」「幹仔我袂做得入去得啊。」「汝看我亓冊包內面，看啦，袂要緊，內面亦無囥安全套汝咧驚啥。」施琦毓掀開，看著內面竟然有貯一仔符之類亓物件，則欲問，凌方已經共伊亓跤踢出來，共門鎖咧。
施琦毓坐咧沙發裡（nngh）等。看一下手錶，已經欲六點。房間咧無聲無說。林金煥毋知按佗落行出來，「欸，汝醒囉咿？抑是規暗無睏啊？」「我則隨醒無偌久爾。」「我來去揣幾个丈夫佮我來去買麵乾糊，」林金煥越頭貓貓相，「啊凌方是埋去佗落死哪無看見啊？」「伊．．．」施琦毓隨咧想說欲障仔應，凌方就行出來，說，「即位即位，猶未死咧。」
林金煥奸笑，「喔～，內面佗一个美女，我看覓咧。」凌方共門闔（kha̍h）咧，「“帅哥”啦，美女！」「好勢好勢，汝愛“帅哥”阮嘛無法，汝等我一下，我佫去叫幾个。」
施琦毓看見林金煥一行，隨走去問凌方，「障仔啊障仔啊？」「傳伊睏一下就好勢囉，毋通共伊叫醒，」凌方開門予伊入去。「猶佫有，下擺看著符毋通七賤八賤。」「我哪有啊！」「毋是說汝，恁今仔下晡是毋是去著餐廳三樓？」「汝哪知？」「我佫乜仔鬼嘛知。伊固定是臭賤手，去沾著暗室內面亓物件。啊反正恁下過無代誌免去彼位就是囉。」「好囉，有話等咧則勻仔說。」林金煥帶一括（kuah）儂行到樓梯口，共凌方拖過去，「來來來，來去買麵乾糊。」「驚死儂吶，敢（kiám）著僎濟儂去！」「毋去無汝亓份喔，咱是先說咧喔。」「有外賣通叫無。」「叫恁母啦，恁父使汝亓尻川欲毋！」．．．
沙發裡（nngh）睏坦橫亓，流瀾亓計去吵醒，目睭挼挼咧話筒攑起來佫繼續唱。樓下幾落隻大綿羊做一下發動。許燕瑜門開出來，行到施琦毓面前，「即搭是佗搭落啊，我哪啥物都袂記得啊。」
施琦毓手共牽咧，「汝啉甲計麻去囉乎？叫汝袂啉免啉汝佫毋信！」
川续断然 - 2010-11-23 16:55:00
有难度[em12]
