佇一塊新起的厝，房間野濟个。毋是大舅怹地亦毋是姑丈怹地，毋過王配敿林文益皆徛佇內面。
王配的房間，佇敿怹舊厝伊彼間仝號的位置，毋過內面空間野開闊。夢中我睏伊的房間。醒來的時節揣無所在通洗喙洗面。出房間行到廳咧。電視佮沙發的位置敿王配舊厝較仝號仝號。揀一个方向去揣浴室。逐間房皆帶浴室。我一間一間開過去，皆有儂。
夢奇怪的所在，就是汝明明佇恁阿姑地，開一个門就到恁阿舅地。我毋知開到第幾个門，看着林文益倒佇大妗的紅眠床釀。我佫去開其他門，毋知障仔就到一間完全無印象的房間。毋是阮地毋是大舅姑丈舅仔姨仔抑是大姨怹地的房間，亦毋是施養鑫怹地的房間。即个房間無儂。我徛佇水弧前，任揣都揣無齒觳齒抿。
然後我開始起狂，即間房走去彼間房。夢的开始我是佇姑丈地王配的房間，路尾已經褿亂去。林文益怹舊厝，施少默怹二樓，我捌去過的所有房間全部出現佇即塊奇怪的厝。
最後一間房。開開，竟然倒倒來王配的房間。即間房毋知底時生出第三个門。開開，又佫是一間房。一个我毋捌的儂咧洗喙。伊共齒抿摕度我，面頂猶有伊的齒膏沫。我接過來就洗。
洗了我行到廳咧，越一个頭，看見王媚坐咧廳桌邊頭，手托下頦，對我笑。
於庚寅年四月初七
